Ab Tum Kehtay Ho Hisab Do

Published by Prince on Tagged Poetry

Ab tum kehtay ho hisab do??
jab un ginat sa`atain beet gayen
jab ankhon key behtay darya banjar hoyee
jab sapnon key sab hi rastay jam hoyee

Ab tum kehtay ho hisab do??

ab jab dhoop raat gaye rehti hay
jab gham tanhai ka saathi hay
jab apna saya dhoop sey bachta hay

Ab tum aye ho?
Ab tum kehtay ho hisab do??

woh jo chand lamhay ki khushi the
rooth gaye
mein ney muskurahtein bhi beech dein
yadon key dareechay per Asaib ka saya hay
hadyon key is panjar mein rooh ik awara hay
koi sapna nahi raha
koi apna nahi raha
saath ka koi asra nahi raha..

Ab jab tum aye hi ho
tu yeh bhi sun lo
zindagi guzar chuki hay
or rait key is ghar mein
zameen talay dabi
faqat ik pukar goonjti hay

tum ab aye ho??
Ab tum kehtay ho hisab do?

April 1st, 2008

Subscribe to our RSS feeds!